अंबाजोगाई शहराचा पाणीपुरवठा विस्कळीत ; ज्येष्ठ समाजसेवक नंदकिशोर मुंदडांनी नगरपरिषद प्रशासनाला धारेवर धरले

सणासुदीच्या काळात पाणीपुरवठा सुरळीत करण्याची मागणी

=======================================

अंबाजोगाई / संपादक रणजित डांगे (लोकनायक डिजिटल मिडीया न्युज नेटवर्क)

ऐन उन्हाळ्यात आणि सणासुदीच्या काळात अंबाजोगाई शहराला १० ते १५ दिवसांला पाणीपुरवठा होत आहे. यामुळे नागरिक हवालदिल झाले असून नगरपरिषद प्रशासना विरोधात संताप व्यक्त केला जात आहे. पाण्याअभावी होणाऱ्या नागरिकांच्या हालअपेष्टा लक्षात घेत जेष्ठ समाजसेवक नंदकिशोर मुंदडा यांनी मंगळवारी (दि.११) कार्यकर्त्यांसह नगर परिषदेत जाऊन प्रशासनाला धारेवर धरत मुख्याधिकाऱ्यांना निवेदन दिले. 

अंबाजोगाई शहराचा पाणी पुरवठ्याच्या प्रश्न बिकट बनलेला आहे. शहरात कोणत्याही भागात नियमित व सुरळीत होत होत नाही. गेल्या काही दिवसांपासून महिन्यातून दोनदा तर पंधरा दिवसांतून एकदा पाणी पुरवठा होत आहे. पाणी पुरवठा करणारी यंत्रणा ही संपूर्णपणे विस्कळीत झाली आहे. ठिकठिकाणी पाईपलाईन फुटल्या आहेत. सध्या मुस्लिम बांधवांचा पवित्र रमजान महिना सुरू आहे. भारतरत्न डॉ.बाबासाहेब आंबेडकर यांची जयंती देखील जवळ आली आहे. अक्षय तृतीया व रमजान ईद असे मोठे सण येत्या दिवसांत आहेत. नेमके सध्या सणासुदीचे दिवस सुरु असताना शहराला १० ते १५ दिवसांला पाणीपुरवठा होत असल्याने नागरिकांना असंख्य अडचणींना तोंड द्यावे लागत आहे. त्यामुळे नागरिकांच्या हालअपेष्टा लक्षात घेत जेष्ठ समाजसेवक नंदकिशोर मुंदडा यांनी मंगळवारी कार्यकर्त्यांसह नगर परिषदेत धाव घेतली आणि नगरपालिका प्रशासनाच्या ढिसाळ कारभाराबद्दल संताप व्यक्त केला. यावेळी त्यांनी फुटलेल्या पाईपलाईन तात्काळ दुरुस्त करून पाणीपुरवठा सुरळीत करावा, तुंबलेली गटारे साफ करावी, गल्लोगल्ली स्वच्छता मोहीम राबवावी, घंटागाडी सुरळीत करावी, वराहांचा आणि मोकाट जनावरांचा बंदोबस्त करावा असे निवेदन मुख्याधिकाऱ्यांना दिले. यावेळी मुंदडा यांच्या समवेत माजी उपनगराध्यक्ष शेख रहीमभाई, सारंग पुजारी, अनंतदादा लोमटे, माजी नगरसेवक सुरेशराव कराड, संजय भाऊ गंभीरे, कमलाकर आण्णा कोपले, दिलीपदादा सांगळे, महादूजी मस्के, बाला पाथरकर, खलील भाई मौलाना, ताहेरभाई, हनुमंत तौर, अखिल भारतीय मराठा महासंघाचे जिल्हाध्यक्ष राणा चव्हाण, राजेश वाहूळे, प्रशांत आदनाक, डॉ.निशिकांत पाचेगावकर व राजपाल सारडा उपस्थित होते.

मुंदडांच्या झाडाझडतीचा झटपट परिणाम :

दरम्यान, ज्येष्ठ समाजसेवक नंदकिशोर मुंदडा यांनी घेतलेल्या पावित्र्याचा लगोलग परिणाम दिसून आला. पाणी सहा ते आठ दिवसाला देण्याचे, लिकेज आढळून आल्यास एकाच दिवसांत काढण्याचे मुख्याधिकाऱ्यांनी मान्य केले आहे. तसेच, मोठे नाले खरडून साफ करण्यात येणार असून डुकरे आणि भटके कुत्रे पकडण्याचे कंत्राट ही चालू आठवड्यात काढण्यात येणार आहे.

=======================================