ब्रेकिंग न्यूज : अजितदादा पुन्हा नॉट रिचेबल

महाराष्ट्रात राजकीय भूकंपाचे संकेत ; सत्तानाट्याचा दुसरा अंक सुरू..?

=======================================

मुंबई / विशेष प्रतिनिधी (लोकनायक डिजिटल मिडीया न्युज नेटवर्क)

महाराष्ट्राचे माजी उपमुख्यमंत्री आणि सध्याचे विधानसभेचे विरोधी पक्ष नेते अजितदादा पवार काही आमदारांसह नॉट रिचेबल आहेत अशा चर्चा सुरू झाल्या आहेत. त्यातच सामाजिक कार्यकर्त्या आणि आपच्या माजी नेत्या अंजली दमानिया यांनी एक सूचक ट्वीट केलं आहे. त्यामुळे या चर्चांना आणखी उधाण आलं आहे. याबाबत मिळालेली अधिक माहिती अशी की, अजितदादा पवार हे काल सकाळी पुण्यात होते. अजितदादा पवार यांनी अचानक पुण्यातले सर्व कार्यक्रम रद्द केले आणि तेव्हापासूनच ते नॉट रिचेबल आहेत अशा चर्चा होत आहेत.

▫️ काय आहे अंजली दमानिया यांचं ट्वीट ?

सामाजिक कार्यकर्त्या अंजली दमानिया यांनी उपमुख्यमंत्री देवेंद्रजी फडणवीस आणि विधानसभेचे विरोधी पक्ष नेते अजितदादा पवार यांच्या पहाटेच्या शपथविधीचा फोटो ट्वीट केला आहे आणि "किळसवाणं राजकारण मी पुन्हा येईन..?" असं कॅप्शन अंजली दमानिया यांनी दिलं आहे. त्यामुळे अजितदादा नॉट रिचेबल अशा बातम्यांना आणि चर्चांना चांगलंच उधाण आलं आहे.

अजितदादा पवार यांच्यासह नॉट रिचेबल असलेले अन्य आमदार कोण हे अद्याप ही समजू शकलेलं नाही. मात्र राज्याच्या राजकारणात पुन्हा एकदा बंड होणार का ? अशा सगळ्या चर्चाही सोशल मीडियावर होताना दिसत आहेत. मुख्यमंत्री एकनाथराव शिंदे ९ तारखेला अयोध्या दौऱ्यावर जात आहेत, त्यांच्या बरोबर २४ तास आधी अजितदादा पवार काही आमदारांसह नॉट रिचेबल असल्याच्या चर्चा ही सोशल मीडियावर सुरू झाल्या आहेत. सामाजिक कार्यकर्त्या अंजली दमानिया यांच्या प्रमाणेच इतर अनेकांनी अजितदादा पवार नॉट रिचेबल आहेत अशी ट्वीट केली आहेत. एवढंच नाही तर अनेकांनी अजितदादा पवारांचा उद्धवजी ठाकरेंच्या बाजूला उभं राहून डोळा मारतानाचा व्हिडीओ ही ट्वीट केला आहे. मागच्या वर्षी जून महिन्याच्या २१ तारखेला एकनाथराव शिंदे नॉट रिचेबल झाले आणि शिवसेनेत उभी फूट पडली. त्यानंतर महाविकास आघाडी सरकार कसं कोसळलं ? शिंदे - फडणवीस सरकार कसं स्थापन झालं ? हे महाराष्ट्राने पाहिलं आहेच. अशात आता अजितदादा पवार नॉट रिचेबल असल्याच्या चर्चामुळे महाराष्ट्रातील सत्तानाट्याचा दुसरा अंक पाहायला मिळणार का ? आणि तो काय असणार याची चर्चा राजकीय वर्तुळातही सुरू झाली आहे.

=======================================