युवा नेते अक्षयभैय्या मुंदडा यांच्या हस्ते झाले धृपद महोत्सवाचे शानदार उद्घाटन

पद्मश्री शंकरबापू आपेगावकर यांचा वारसा पुढे चालविण्यासाठीच धृपद महोत्सवाचे आयोजन - युवा नेते अक्षयभैय्या मुंदडा

============================================== 

अंबाजोगाई / संपादक रणजित डांगे (लोकनायक मिडीया न्युज नेटवर्क)

अंबाजोगाई शहराला ऐतिहासिक सांस्कृतिक आणि कलेचा वारसा आहे हा वारसा जतन व्हावा म्हणून महाराष्ट्र राज्य सांस्कृतिक संचालनालयाचे वतीने या तीन दिवसीय धृपद महोत्सवाचे आयोजन करण्यात आले असून हा वारसा जतन करण्याचे काम अशा वेगवेगळ्या सांगीतिक कार्यक्रमाचे आयोजन करून करण्यात येईल असे मत युवा नेते अक्षयभैय्या मुंदडा यांनी व्यक्त केले.

अंतरराष्ट्रीय ख्यातीचे पखावज वादक पद्मश्री शंकरबापू आपेगावकर यांच्या स्मृतीप्रित्यर्थ राज्य शासनाच्या सांस्कृतिक विभागाच्या वतीने दि. 15 ते 17 एप्रिल दरम्यान मुकुंदराज सभागृहामध्ये धृपद संगीत महोत्सवाचे आयोजन करण्यात आले आहे. या महोत्सवाचे उद्घाटन करताना अक्षयभैय्या मुंदडा बोलत होते. यावेळी व्यासपीठावर प्रख्यात धृपद गायक उदय भवाळकर, योगेश्वरी शिक्षण संस्थेचे अध्यक्ष डॉ.सुरेश खुरसाळे, ज्येष्ठ समाजसेवक नंदकिशोर मुंदडा, उपजिल्हाधिकारी शरद झाडके, अपर जिल्हा पोलिस अधिक्षक कविता नेरकर-पवार, शासनाच्या सांस्कृतिक संचालनालयाचे पटेल व ढगे यांच्यासह मान्यवर उपस्थित होते. यावेळी विस्ताराने बोलताना अक्षयभैय्या मुंदडा पुढे म्हणाले की, ज्यांच्या स्मृती जागृत ठेवण्यासाठी या धृपद महोत्सवाचे आयोजन करण्यात आले आहे त्या कै.पद्मश्री शंकरबापू आपेगावकर यांनी वाढविलेल्या पखवाज या वादन कलेचा आपेगाव ते अमेरीका हा केलेला प्रवास हा थक्क करुन सोडणारा, कला क्षेत्रातील तरूण मुलांना एक प्रदीप ठरणारा आहे. संगीत मग ते कोणत्याही प्रकारातील असो माणसाच्या सुख दुःखात आत्मसमाधान मिळवून देण्याचे फार मोठं काम करते. म्हणून या तीन दिवसीय संगीत समारोहाचा आस्वाद शहरातील संगीत प्रेमींनी मोठ्या प्रमाणावर घ्यावा असे आवाहन केले. या कार्यक्रमाचे प्रास्ताविक करताना पं.उध्दव बापू आपेगावकर यांनी या तीन दिवसीय धृपद समारोपाच्या आयोजना मागील संकल्पना सांगितली. या कार्यक्रमाचे सुत्रसंचलन तालमार्तंड प्रकाश बोरगावकर यांनी केले. या उद्घाटनपर कार्यक्रमानंतर लगेच पं.उध्दबापू आपेगावकर आणि टीम च्या वतीने मंगल वाद्य 'पखावद वंदना' सादर करण्यात आली. तर धृपद गायनासाठी भोपाळ येथील उस्ताद अफजलजी हुसेन तर नवीदिल्ली येथील धृपद गायन पद्मश्री उस्ताद वसिफुद्दीन डागर हे सादरीकरण केले. रविवारी 16 एप्रिल रोजी पुणे येथील विदुषी मेघना सरदार, पं.उदयजी भवाळकर यांचे धृपद गायन होईल. तर बिहार येथील पं.प्रेमकुमारजी मल्लीक व पं.प्रशांत मल्लीक यांचे धृपद गायन व जुगलबंदी रंगणार आहे. सोमवारी पं.भूषण कोष्टी (सुर बाहर वादन) तर कोलकत्ता येथील पं.सुप्रियो मैत्रो यांचे धृपद गायन होईल. त्यानंतर उस्ताद मोई.बहाउद्दीन डागर (मुंबई) यांचे रूद्रविना वादन होईल. त्यांना विवेक कुरंगळे हरिप्रसाद गाढेकर, सनतकुमार बडे, आसाराम जोशी, अनंत जाधव, बंकटकुमार बैरागी, प्रशांत घरत, गुडे सर हे सातसंगत करणार आहेत. वसुंधरा सेवा प्रतिष्ठानच्या सहयोगाने व महाराष्ट्र शासनाच्या सांस्कृतिक संचालनालयाचे वतीने होत असलेल्या या तीन दिवसीय धृपद संगीत महोत्सवाचा रसिक - श्रोत्यांनी लाभ घ्यावा असे आवाहन केज विधानसभा मतदारसंघाच्या आ.सौ.नमिताताई अक्षय मुंदडा यांच्या वतीने करण्यात आले आहे.

===============================================