कोरोनाचा नवा व्हेरीयंट देतोय रोगप्रतिकारक शक्तीला चकवा

देशांतील राज्यात पसरला कोरोनाचा नवा व्हेरिएंट, वाचा तज्ज्ञांनी काय इशारा दिलाय..?

(प्रतिकात्मक फोटो - सौजन्य सोशल मीडिया)

============================================

मुंबई (लोकनायक डिजिटल मिडीया न्युज नेटवर्क)

 

देशात आता पुन्हा कोरोनाचा धोका निर्माण झाला आहे. मागील 24 तासांत या विषाणूचे 3016 नवीन रूग्ण देशात आढळले आहेत. ज्यांना अन्य काही आजार आहेत अशा काही रूग्णांचा मृत्यू ही या नव्या व्हेरीयंटमुळे झाला आहे, अशी माहिती मिळत आहे, ही मोठी चिंतेची बाब आहे. कोविडमुळे देशांतील काही राज्यांत रूग्णांचा मृत्यू झाला आहे. तज्ज्ञांचे म्हणणे आहे की, कोरोनाच्या नवीन ओमिक्रॉन सब-व्हेरियंटमुळे प्रकरणे वाढत आहेत. ओमिक्राॅन एक्स-बीबी.1.16 हा प्रकार वेगाने पसरत आहे आणि लोकांना संक्रमित करीत आहे. हा प्रकार रोगप्रतिकार शक्तीला (इम्युनिटी) चकवा देत आहे. आरोग्य मंत्रालयाच्या आकडेवारी नुसार, देशातील 11 राज्यांमध्ये एक्स-बीबी.1.16 प्रकाराची काही प्रकरणे नोंदविण्यात आली आहेत. या प्रकारातील प्रकरणांची संख्या आता 600 च्या पुढे गेली आहे. महाराष्ट्र, दिल्ली, गुजरात, कर्नाटक आणि मध्यप्रदेश मध्ये एक्स-बीबी प्रकारांची अधिक प्रकरणे समोर येत आहेत. या प्रकारामुळे मृत्यूही होत आहेत. या प्रकाराची वाढती प्रकरणे लक्षात घेता केंद्र सरकारने सर्व राज्यांना जीनोम सिक्वेंन्सिंग वाढविण्याचे निर्देश दिले आहेत. लोकांनी आता सावध राहण्याची गरज वरिष्ठ डॉक्टरांच्या सांगण्यानुसार, कोविडच्या प्रकरणांमध्ये वाढ होण्यामागे हा नवा व्हेरिअंटही असू शकतो. ज्या लोकांची प्रतिकार शक्ती कमकुवत झाली आहे त्यांना त्याचा संसर्ग होत आहे. कोरोना प्रकरणांमध्ये वाढ होण्याचे आणखी एक कारण म्हणजे उत्तम चाचणी हेही आहे. लोक फ्लूच्या लक्षणांसह रूग्णालयात जात आहेत, जिथे त्यांची कोविड चाचणी देखील केली जात आहे. चाचण्यांमध्ये लोकांना संसर्ग झाल्याचे आढळून येत आहे आणि रूग्णांची संख्या वाढत आहे. कोविडच्या प्रकरणांमध्ये आणखी वाढ होऊ शकते अशी शक्यता वैद्यकीय क्षेत्रातील संशोधक, आणि तज्ज्ञांनी व्यक्त केली आहे. अशा परिस्थितीत लोकांनी सावध राहण्याची गरज आहे. लोकांना मास्क घालण्याचा आणि गर्दीच्या ठिकाणी जाण्याचे टाळण्याचा तसेच सॅनिटायझरचा वापर करण्याचा सल्ला देण्यात आला आहे. अस्थमा किंवा श्वसनाचा त्रास असेल तर निष्काळजीपणा नको, श्‍वसनाचे आजार असलेल्या रूग्णांनी यावेळी सतर्क राहावे, असे डॉक्टरांनी नमूद केले. कोविडच्या नवीन प्रकारामुळे काही समस्या वाढू शकतात. त्यामुळे श्वसनाचा आजार असणाऱ्या लोकांना त्यांच्या आजारासाठी औषध नियमितपणे घेत राहण्याचा सल्ला दिला जातो. तसेच, कोणत्याही संक्रमित रूग्णाच्या संपर्कात येणे टाळा. जर कोणाला खोकला - सर्दी किंवा सौम्य ताप असेल तर त्यांच्यापासून सुरक्षित अंतर ठेवा. कोविडची लक्षणे दिसल्यास ताबडतोब आपल्या फॅमिली डॉक्टरांशी संपर्क साधावा असे आवाहन लोकनायक डिजिटल मिडीया न्युज नेटवर्कच्या माध्यमातून जनहितार्थ जारी करण्यात येत आहे.

=========================================