पत्रकार समाजासाठी देणे लागते या भावनेतून जिल्हा प्रसिद्धीप्रमुखांनी कार्य करावे - ऑनलाईन बैठकीत मुख्यविश्वस्त एस.एम.देशमुख यांचे आवाहन

मराठी पत्रकार परिषदेच्या राज्यातील जिल्हा प्रसिद्धीप्रमुखांची ऑनलाईन बैठक

=============================================

मुंबई (लोकनायक डिजिटल मिडीया न्युज नेटवर्क)

"चळवळीच्या माध्यमातून आपण पत्रकारांचे अनेक प्रश्न सोडविले आहेत. उर्वरीत प्रश्नांसाठी आपला संघर्ष सुरूच आहे. पत्रकारांना न्याय हक्क मिळवून देणे हे आपले ध्येय आहे. पत्रकारांचे संघटन म्हणून आपण आज मराठी पत्रसृष्टीत प्रथम क्रमांकावर आहोत. बड्या वृत्तपत्रांचे धनदांडगे मालक व सरकार आपल्या विरोधात आहेत, आपल्या संघटनेला ते चहुबाजुंनी कमकुवत करण्याचा प्रयत्न करीत आहेत, आपले फळांचे झाड आहे, त्या झाडाला बहर येऊ द्यायचा की वांझोटे ठेवायचे ? याचा आपण गंभिरपणे विचार करावा. पत्रकार समाजासाठी देणे लागते या भावनेतून परिषदेच्या प्रसिद्धी विभागाने अधिक जागृत राहून परिषद करीत असलेले विधायक काम सक्षमपणे लोकांपर्यंत पोहचविले पाहिजेत’’ असे आवाहन मराठी पत्रकार परिषदेचे मुख्य विश्वस्त एस.एम.देशमुख यांनी राज्यातील जिल्हा प्रसिद्धीप्रमुखांच्या ऑनलाईन बैठकीत मार्गदर्शन करताना केले.

या बैठकीत एस.एम.देशमुख पुढे म्हणाले की, ‘‘विरोधकांच्या अपप्रचाराकडे लक्ष न देता आपले विधायक काम करीत राहणे हेच त्यांना चोख उत्तर आहे. परिषद पत्रकारांच्या हक्कांसाठी ज्या जोमाने काम करते आहे, त्या प्रमाणात आपण प्रसिद्धी करण्यात कमी पडतो आहोत अशी खंत ही त्यांनी यावेळेस व्यक्त केली. परिषदेची चळवळ वाढावी म्हणून प्रत्येकाने रोज कमीत कमी परिषदेच्या कामासाठी दहा मिनिटे वेळ द्यावा व येत्या 7 एप्रिल रोजी अहमदनगर जिल्ह्यातील कर्जत येथे होणाऱ्या आदर्श तालुका, जिल्हा पुरस्कार वितरण सोहळा मेळावा ताकदीने यशस्वी करावा असे आवाहन एस.एम.देशमुख यांनी याप्रसंगी केले. मराठी पत्रकार परिषदेचे विश्वस्त किरणजी नाईक यावेळी मार्गदर्शन करताना म्हणाले की, राज्यातील पत्रकारांना त्यांचे हक्क मिळवून देत चळवळ पुढे नेणे ही आपली नैतिक जबाबदारी आहे. राज्यातील पत्रकार एक प्रमुख संघटना म्हणून आपल्याकडे, मराठी पत्रकार परिषदेकडे पाहतात. पत्रकारांचे नेतृत्व करण्यात आपली संघटना राज्यात आघाडीवर आहे, संवाद ठेवा, काम करा, ठसा उमटवा, कामाची पद्धत बदलली तर नक्कीच परिषदेचे काम अजून जोमाने वाढू शकते. चळवळीतून पत्रकारांचे अनेक प्रश्न सोडविले, याचा आपल्याला अभिमान आहेच, उर्वरीत प्रश्न सोडविण्यासाठी आपण कटिबद्ध राहू या असेही आवाहन किरणजी नाईक यांनी केले. तब्बल दोन तास चाललेल्या या ऑनलाईन बैठकीचे सूत्रसंचलन परिषदेचे अध्यक्ष शरदजी पाबळे यांनी केले होते. बैठक़ीस राज्यभरातून तीसहून अधिक जिल्हा प्रसिद्धीप्रमुख व पदाधिकारी यांनी आपला सहभाग नोंदवून संघटना वाढी बाबत चर्चेत आपला सहभाग नोंदविला व अधिक सक्रीय होण्याची हमी दिली. या ऑनलाईन बैठकीत परिषदेचे सरचिटणीस हाजी मन्सूरभाईजी शेख, महिला आघाडीच्या राज्य संघटक शोभाताई जयपूरकर, उपाध्यक्ष जान्हवीताई पाटील, उपाध्यक्ष शिवराजजी काटकर, उपाध्यक्ष गो.पि.लांडगे, कोषाध्यक्ष विजयजी जोशी, राज्य जनसंपर्क प्रमुख अनिलजी महाजन, राज्य डिजिटल मिडीयाप्रमुख अनिलजी वाघमारे, किशोरजी महाजन, बाळासाहेबजी ढसाळ, अमोलजी वैद्य, नारायणजी माने, मोहनजी चौकीदार, संजयजी हंगे, रामजी साळुंके, संदीपजी कुळकर्णी, सुभाषजी राऊत, कमलेशजी ठाकूर, राजाभाऊजी अदाते, विजयजी होलम, दिपकजी केतके, सुरेशजी नाईकवाडे आदींसह मान्यवर पत्रकार बांधव उपस्थित होते.

 ▫️▫️▫️

==========================================