ज्येष्ठ नेते तथा राष्ट्रवादी काँग्रेसचे अध्यक्ष खा.शरदचंद्र पवार यांच्या नेतृत्वात अधिवेशनाच्या पहिल्याच दिवशी नागपूर विधानभवनावर राष्ट्रवादीचा 1 लाख लोकांचा प्रचंड मोर्चा

ज्वलंत मुद्द्यांवर हिवाळी अधिवेशनात राष्ट्रवादी काँग्रेस आक्रमक पवित्रा घेऊन सत्ताधारी शिंदे - फडणवीस सरकारला घेरणार

======================

नागपूर (विशेष प्रतिनिधी- लोकनायक डिजिटल मिडीया न्युज नेटवर्क)

शेतकर्‍यांचे प्रश्न, पीकविम्याचा मुद्दा, गगनाला भिडलेली महागाई आणि राज्यपालांची सततची वादग्रस्त विधाने यासह विविध ज्वलंत मुद्द्यांवर हिवाळी अधिवेशनात राष्ट्रवादी काँग्रेस आक्रमक पवित्रा घेऊन सत्ताधारी शिंदे - फडणवीस सरकारला घेरणार आहे. ज्येष्ठ नेते तथा राष्ट्रवादीचे अध्यक्ष खा.शरदचंद्र पवार यांच्या नेतृत्वाखाली राष्ट्रवादी काँग्रेस पक्ष अधिवेशनाच्या पहिल्याच दिवशी विधानभवनावर तब्बल 1 लाख लोकांचा मोर्चा काढून शिंदे-फडणवीसांना विविध प्रश्नांवरून लक्ष्य करेल. विरोधी पक्षाचा अधिवेशनाचा पहिल्याच दिवशीचा आक्रमक पवित्रा पाहता संपूर्ण अधिवेशन वादळी ठरेल, यात शंका नाही.

कोरोनामुळे मागील दोन वर्षांपासून हिवाळी अधिवेशन मुंबईत होत आहे. मात्र, यंदाचे हिवाळी अधिवेशन हे नागपूरमध्ये घेण्यात येत आहे. 19 डिसेंबरला अधिवेशन सुरू होईल. गेल्या चार महिन्यांपूर्वी राज्यात सत्तांतर झाले. विद्यमान मुख्यमंञी एकनाथराव शिंदे यांनी महाविकास आघाडीशी फारकत घेतली, शिवसेनेच्या समर्थक आमदार व खासदार यांना सोबत घेवून भाजपच्या साथीने नवे सरकार स्थापन केले. या सरकारला आता जवळपास चार महिने उलटून गेलेत. मात्र ओल्या दुष्काळाचा मुद्दा, पीक विम्याचा प्रश्न, महागाई, राज्यपालांची वाद निर्माण होतील अशी विधाने, मंत्रिमंडळाचा रखडलेला विस्तार यावरून विरोधी पक्ष आक्रमक भूमिका घेण्याच्या तयारीत आहे. यासाठीच्या एकत्रित रणनीतीसाठी महाविकास आघाडीची बैठक ही मुंबईत पार पडली आहे. 

ज्येष्ठ नेते खा.शरदचंद्र पवार यांच्या नेतृत्वात राष्ट्रवादीचा मोर्चा :

================

अधिवेशनादिवशी काढण्यात येणार्‍या मोर्चासंबंधी माहिती देताना माजी गृहमंञी आ.दिलीपराव वळसे पाटील यांनी सांगितले, नव्या सरकारच्या कामावर राज्यातील जनता नाराज आहे. याचमुळे सरकार विरोधात जनतेमध्ये मोठा रोष आहे. हाच रोष व्यक्त करण्यासाठी राष्ट्रवादी काँग्रेसने अधिवेशनाच्या पहिल्याच दिवशी विधान भवनावर मोर्चा काढण्याचे नियोजन केलेले आहे. त्यानुसार ज्येष्ठ नेते खा.शरदचंद्र पवार यांच्या नेतृत्वात लाखो लोकांच्या साक्षीने हा मोर्चा निघणार आहे. त्यासाठी राष्ट्रवादीच्या ज्येष्ठ पदाधिकार्‍यांवर विशिष्ट जबाबदारी देण्यात आलेली आहे.

========================